TODAY 9 SANDESH NEWS
– –
રંગપુર પ્રાથમિક શાળા માટે આ વર્ષ ઐતિહાસિક રહ્યું છે. જિલ્લા કક્ષાની સક્ષમ શાળા મૂલ્યાંકનમાં શાળાએ પ્રથમ સ્થાન પ્રાપ્ત કરી, સમગ્ર જિલ્લામાં શૈક્ષણિક અને સામાજિક ક્ષેત્રે એક નવી ઓળખ ઊભી કરી છે. આ સિદ્ધિ પાછળ શિક્ષકમંડળની કઠિન મહેનત, વિદ્યાર્થીઓનો સક્રિય સહભાગ, વાલીઓનો સહકાર અને ગ્રામજનોનો અવિરત ટેકો છે.
તારીખ 12 ઓગસ્ટ ને મંગળવારના રોજ સંસ્કાર હાઈસ્કુલ કાલિયાવાળી ખાતે જિલ્લા કક્ષાનો સક્ષમ શાળા એવોર્ડ વિતરણ સમારોહ યોજાયો. નવસારી જિલ્લા વહીવટી તંત્રના વડા કલેક્ટર ક્ષિપ્રા આગ્રે, નવસારી જિલ્લા વિકાસ અધિકારી પુષ્પા લતા,જિલ્લા શિક્ષણ અધિકારી જયેશભાઈ ચૌધરી , જિલ્લા પ્રાથમિક શિક્ષણ અધિકારી ડૉ. અશોકભાઈ અગ્રવાલ અને જિલ્લા શિક્ષણ અને તાલીમ ભવન નવસારીના પ્રાચાર્ય મુખ્ય મહેમાન હતા.જેમાં રંગપુર પ્રાથમિક શાળા વાંસદા તાલુકા અને નવસારી જિલ્લામાં સક્ષમ શાળામાં પ્રથમ ક્રમાંકે રહી. સ્વચ્છતા – આરોગ્ય તરફ પહેલ સ્વચ્છતા માટે રંગપુર શાળાએ અભૂતપૂર્વ પગલાં લીધાં છે. “સ્વચ્છ શાળા – સ્વસ્થ વિદ્યાર્થીઓ” સૂત્રને આધારે, આરોગ્ય જાગૃતિ અભિયાન, હાથે ધોવાની આદતો અને પ્લાસ્ટિક મુક્ત પરિસરની દિશામાં પ્રેરણા આપવામાં આવે છે. પર્યાવરણ માટે પ્રતિબદ્ધતા
હરિત શાળાના સપનાને સાકાર કરવા માટે શાળાએ પરિસરમાં અનેક વૃક્ષો અને ફૂલોના છોડ રોપ્યા છે. “જન્મ દિવસે એક છોડ અભિયાન અંતર્ગત દરેક વિદ્યાર્થીને એક છોડની સંભાળ સોંપવામાં આવી છે. વરસાદી પાણીના સંચય માટે રૂફ વોટર હાર્વેસ્ટિંગ સિસ્ટમ સ્થાપિત કરાઈ છે. સોલાર પેનલ દ્વારા ઊર્જા બચત થાય છે અને પર્યાવરણને અનુકૂળ કાર્ય થાય છે. શાળાની દિવાલો પર પર્યાવરણ સંદેશ આપતાં ચિત્રો અને સૂત્રો લખીને બાળકોમાં હરિયાળીની પ્રેરણા ફેલાવવામાં આવી છે સલામત – વિદ્યાર્થીઓની સુરક્ષા સર્વોપરીવિદ્યાર્થીઓની સુરક્ષા શાળાનું મુખ્ય ધ્યેય છે. આગથી બચાવના સાધનો (ફાયર એક્સ્ટિંગ્યુઇશર), આપત્તિ સમયે બહાર નીકળવાના માર્ગ અને સુરક્ષા અભ્યાસ (Mock Drill) નિયમિત કરવામાં આવે છે. શાળામાં પ્રવેશદ્વાર પર CCTV કેમેરા લગાવવામાં આવ્યા છે, જેથી બાળકોની દેખરેખ સતત રહે. ટ્રાફિક જાગૃતિ કાર્યક્રમો દ્વારા વિદ્યાર્થીઓને રસ્તા પર સલામતીના નિયમો સમજાવવામાં આવે છે. રમતના મેદાનમાં સાધનો સુરક્ષિત રીતે ગોઠવવામાં આવ્યા છે, જેથી કોઈ અકસ્માત ન બને.
સ્થાયી – દીર્ઘકાલીન વિકાસ માટેનો દ્રષ્ટિકોણ
સ્થાયી વિકાસ માટે શાળાએ શિક્ષણ અને પર્યાવરણ બંનેમાં દીર્ઘકાલીન યોજના ઘડી છે. વીજળી બચાવવા એલઈડી લાઈટનો ઉપયોગ, વરસાદી પાણીના પુનઃઉપયોગ, અને કાગળ બચાવવા ડિજિટલ શૈક્ષણિક સામગ્રીનો ઉપયોગ કરવામાં આવે છે. શૈક્ષણિક ક્ષેત્રે સ્માર્ટ ક્લાસરૂમ, કોમ્પ્યુટર લેબ, વિજ્ઞાન લેબ અને રોબોટિક્સ લેબ દ્વારા વિદ્યાર્થીઓને ભવિષ્યના પડકારો માટે તૈયાર કરવામાં આવે છે.
રંગપુર શાળાની આ સિદ્ધિ માત્ર એક એવોર્ડ નહિ, પરંતુ સમગ્ર ગામ અને જિલ્લાનું ગૌરવ છે. “સ્વચ્છતા, હરિત, સલામત અને સ્થાયી” – આ ચાર સ્તંભો પર આધારિત શાળાની કામગીરીએ શિક્ષણ સાથે જીવન મૂલ્યોને પણ મજબૂત બનાવ્યા છે. આ પ્રયત્નો આગામી પેઢીને વધુ સંવેદનશીલ, જવાબદાર અને પ્રગતિશીલ નાગરિક બનાવવામાં મહત્વપૂર્ણ ભૂમિકા ભજવશે.
TODAY 9 SANDESH NEWS
અમિત મૈસુરીયા
